Tedo Nyoyo

Kawuono ahero puonjo yawa man loka piny wasungu tedo nyoyo. Ang’eyo ni nwang’o oduma kod oganda samoro osemono yawa man loka mang’eny tedo nyoyo. To kata kamano nitieye kaka inyalo timo ma ited nyoyo mamit mana machiegni gi ma dala.

1. Dhi e duke madongo mag chiemo mondo inyiew odumb ondelo ma odiero dendo ni popcorn. Oganda motuo bende inyiew. Inyalo yudogi ka otwegi e jwala mar ratil achiel kata ariyo.
2. Kaw oduma aye ibidi e pi ka pok idhi tich kata kapok inindo mondo obidre seche ma bwora.
3. Law oduma gi e pi mang’ich aye iketi e kendo mondo ochiegi kuom seche ariyo. Sama oduma chiekno to bid oganda bende e pi mang’ich.
4. Bang’ seche ariyo to law oganda bende aye iolie oduma man e kendo. Seche gi bende inyalo pere chumbi moromo ewi nyoyo. Dhi nyime kod chweko kuom saa achiel kendo kata nyaka oganda chiegi.

Nyoyo kose chiek, to koro tok atoka, mondo inyam gi nyuka, kata chai. Jo kapango bende ma dhoggi mit nyalo chiele mana kaka ichielo ringo. Alot bende inyalo riwe.

Akelo Nya Kager

11 thoughts on “Tedo Nyoyo

  1. Tom J. Obengo

    Aneno ka itimo maber kuom konyo yawa ma odak loka ka mondo oyud kak di gikonyre. Nyoyono to mit ndi. A daher mana medo wach kuom dhok (Dho-Luo Grammar). Nyoyo ok tedi; nyoyo inyoyo. Bende nyoyo ok cham; nyoyo imuodo.

    Anyalo medo ni nyuka inudo. Nyuka nogo imadho. Dengu irudo. Kuon itedo, ka aye to ichamo. Bando kata oduma (green maize or corn) iboko, ka aye to imuodo. Chak ichwako. Kit chiemo ma ichamo kod kuon itedo, eka ichamo.

    Mago kende ema an godo e kindeni. To amor gi puonj maler kuom loso chiemb Luo.

  2. Obesh

    Nyoyo bende inyalo loso ulaya.kitiyo gi kendo ulaya kaa seche ariyo ni itedo nyoyo mano tugo nikech mano biro bedo tugo gi mach mar stima. Be nitiye rieko moro? seche adek tedo nyoyo kapango mano ok yot nya kager.
    Migosi Obesh, Hamburg. Germany

  3. Nyar Kanyada

    Ndalo moko ne miluma mar nyoyo ne ohewa ndi.
    Ne adhi angiew oduma ma oseket e mikebe.
    Ayudo oganda miluongo ni roscoco ema budo e pi otieno. Kiny ne achuako oganda mi ochiek.
    Bange akiko oduma kod oganda. Mano nyoyo mamit sidang!

  4. Otieno Ndeko

    Mr Obesh,

    Daher nyisi ni maka nitie loka mang’eny. Gimoro amora mantie kenya nitie loka. Wuothi e duke mopogore ibiro yudogi. Kata oluthkuon ema iduaro. Atedo nyoyo pile.

  5. Oloo K'ogonyo

    Amor kuom winjo ni oluth kuon bende nitie loka. Ma koro nyoyo ni unyalo tede yokono ma mit sipwap. To, obombo bende yudore kono? ng’ano mad nyisa yo mar tedo obambo o yo mong’ith?
    An wuod u Bernado

  6. Nya lego

    Kuom jok mamanyo chiemo ma dala loka..kiyudo duka mar jo mexico kod china..gin gi chembwa mangeny mok kuon, rech mopogore opogore(including omena, mbuta, obambo, fulu)alode mag nyaluo(ododo, boo) rabuond nyaluo, omuogo/mariwa..rabond sit, nduma..nyaka oduma motuo..kachwako chiemo e sitima tek..ngiew agulu mipako ni crockpot..tedo nyoyo mayom kabisa

Leave a Reply

Your email address will not be published. Required fields are marked *