Loso Chak

Ka ne asomo thurwa Ugenya, ne iwewa ga saa auchiel sama jopuonj dhi chiemo ni wan bende wadhi wagagi. Seche mang’eny ne wabet ga mana e tie yien moro e skul ka warito mondo saa aboro ochopi mondo wadogi e klas. Samoro ka ne an gi otonglo na moro ma adiyora godo to ne anyalo nyiewo niang’ anyam. To samoro ka kech ne obemba ahinya, to anyamo ng’wech nyaka dala, mondo miyo omiyae gimoro anang’. Chiemo mane mora ga ahinya ka ayudo ne en kuon gi chak moa e ko ka pok opuo.
Tinde adak mabor gidala, to chak gi kuon to pod ahero ndi. Kuon to ang’eyo ni uduto ung’eyo tedo, kose? Koro adwaro mana nyisou kaka dilos chak ma mit ma chiegni mana chalo gi chak moa e ko.
1. Nyiew 100% lambjus (100% concentrated lemon juice).
2. Kaw chak mang’ich moa e frija aye iol e glas kar moromi madho. Per lambjus moromo kijike ariyo madongo ewi chak.
3. Medie sukari moromore gi milmili mar dhogi. Rude chuth.
4. Weye dakika ariyo kata adek mondo opotno.
Koro yuom ayuoma chak gi kuon kata gi rabuon ka iyudo.

An Akelo Nyar Kager

6 thoughts on “Loso Chak

  1. nyakwar babe

    puonjwa uru loso cha adila nikeh omit to dani mane ong’eyo lose bende ose tho, to aneno moyore gi nyuka abagi

Leave a Reply

Your email address will not be published. Required fields are marked *